1. Juli 2025

Vom Dunnstig, 26. Juni, bis Sunntig, 30. Juni, simmer uf Jubiläumsreis gsi. Ufgrund vo Flugstorniärigä hed sich nu churzfristig ä Planänderig gmacht und miär sind via Valencia (und es paar wenigi nu zuästzlich uber Frankfurt) uf Alicante cho. In Spaniä hemmer de diä scheenstä Summertäg verwitscht und hend ä tolli Reis gha. Vo Poolparties bis i diä tiäfä Nächt, zu Stadttour bi wiit uber 30 Grad und eim Strandtag hemmer d'Ziit richtig chennä gniässä. S'OK-Team hed sich selber ubertroffä und miär wärdid nu lang vo däm Trip redä. Bilder gfindsch wiä immer uf Instagram. Ez gads id Summerpaisä, bevor de im September scho wieder mit dä offiziellä Probä agfangä wird.

1. Juli 2025

Am gestrigä Samstig hemmer iisi Generalversammlig abghaltä. Miär hend gmeinsam s Vereinsjahr 2021/22 abgschlossä und voller Hoffnig uf äs normals 2022/23 gstartet. Uf diä GV hend iis 4 Mitglieder verlah. Miär dankid ihnä für diä Jahr i dem Verein und diä vielä Stundä wo sie i diversä Ämtli gschaffet hed. Miär freiid iis jetzt scho, alli bi dä Uiftritt vor dä Bühni z'gseh. Es hed ai Änderigä im Vorstand gäh: d'Ivana Ming ubergid nach 3 Jahr dä Präsident am Michael Gassmann, dä Matthias Ettlin gid sis Ämtli als Major am motiviärtä Markus Krummenacher ab und dä André von Rotz ubernimmt Kassier vo dä Tamara Rohrer wo sich nach 8 Jahr im Vorstand entschiedä hed chürzer z'trätä. Dä Verein dankt jedem uisträtänä Vorstandsmitglied für diä viel Arbet, gopfertä Stundä, Diskussionä und Müäh wo sich alli gäh hend. Miär sind zuäversichtlich, dass mitem niiwä Vorstand dä Verein cha witerbracht wärdä. Zudem hemmer nu derfä zwei niiwi Ehräfäger ernännä. Mit ihrer Liedäschaft zur Fasnacht, ihrer Arbet wo sie immer leistit, dä konstanti Bereitschaft und Treui zu dä Rätschbäsä hend sie dä kompletti Verein überzügt, dass ä Ehrämitgliedschaft s'einzig Richtigi isch. Miär dankid am Kusi Krummenacher und am Adrian von Moos (besser bekannt als Zofä) für alles wo sie gmacht hend, machid und nu wiiterhin wärdid machä.